மானமுள்ள தமிழர்கள்

மானமுள்ள தமிழர்கள் நாங்கள்
ஈனமுற்று தண்ணீருக்கு அலையோம்
விண்ணுயரும் ஊழலுக்கு துணையிருப்போம்
மின்வெட்டுக்கு  தலையசைப்போம்
பஞ்சத்தை மஞ்சத்திற்கு அழைத்த
வஞ்சகர் கூட்டமென கொஞ்சுதமிழ்
மேடைப்பேச்சில் மயங்கியிருப்போம்
இலவசங்கள் தேடிப்பெற்று
தொலைக்காட்சியில் தொலைந்திருப்போம்
நாட்டை துண்டாடும் மந்திரிகளுக்கு
பேட்டை முழுவதும் விழா எடுப்போம்
சொந்த சகோதரர்கள் குடியறுக்க
பந்தங்களுடன்  துணை நிற்போம்
விளைநிலங்களை வளைத்திடுவோம் பின்
விளைச்சல் இல்லை என புலம்பிடுவோம்
விடிந்ததும் டாஸ்மாக்கை நாடிடுவோம்
குடிகெட குடித்திருப்போம்
தகதகக்கும் வெயில் என்றாலும்
தார்சாலையில் படுத்திருப்போம்
ஜதிபோட்டு ஆடும் குத்தாட்ட நடிகர்களின்
மதிகெட்ட படங்களை கண்டு களித்திருப்போம்
விலைவாசி மலை ஏறினாலும் பெண்டாட்டி
நகை வைத்து கடன் பெறுவோம்
அறைவேட்டியை உருவினாலும்
கரைவேட்டிகள் புகழ் பாடுவோம்
அடிமேல் அடி விழுந்தாலும்
அம்மா, அய்யா என்று
கழகங்களை வாழவைக்கும்
தமிழர்கள் மானமுள்ள
தமிழர்கள் நாங்கள்...