கமலுக்கு அன்போடு ரசிகன் எழுதும் கடிதம்

அன்புள்ள உலகநாயகன் கமலுக்கு

ஒரு தமிழ் சினிமா ரசிகன் எழுதும் கடிதம், நடுவுல பத்ம ஸ்ரீ, உலகநாயகன், காதல் இளவரசன் எல்லாம் போட்டுக்கோங்க.

விஸ்வரூபம் எடுத்து வெளியிடுவதற்கு நீங்கள் பட்ட கஷ்டங்களையும் அடித்த ஸ்டன்டுகளையும், சிரிச்சுகிட்டே நீங்க உருக்கமா கொடுத்த பேட்டிகளையும் எல்லா தொலைகாட்சிகளிலும் போட்டு  இலவசமாக உங்கள் படத்திற்கு விளம்பரம் தேடி கொடுத்தார்கள். அதில் அவர்களுக்கும் லாபம்தேன்.

ஒரு தனி மனிதனுக்காக முதலமைச்சர் இறங்கி வந்து பத்திரிகையாளர்கள் கூட்டம் நடத்தியது தமிழக அரசியலில் இதுவே முதல் தடவை, அதுவும் அம்மா தன்னிலை விளக்கம் கொடுக்க முன் வந்தது பெரிய விஷயம்தான். இதில் ஏதோ அம்மாவிற்கு உங்கள் சொத்து பறிபோய்விடுமோ என்ற அக்கறை என்று நினைத்தால் தமிழனைவிட புத்திசாலி யாரும் இருக்க முடியாது. மற்ற மாநிலங்களில் பிரச்சினை இல்லாமல் படம் வெளிவந்து விட்டதே தமிழ்நாட்டில் வெளிவரவில்லை என்றால் அம்மாவின் ஆட்சியின் மீதும் அவர் கவனிக்கும் காவல் துறை மீதும் மக்கள் வைத்திருக்கும் நம்பிக்கைக்கு குந்தகம் வந்துவிடுமே என்று ஏதாவது ஒரு மொட்டை ..............ன் அறிவுரை வழங்கி இருக்கலாம். மற்றபடி அவருக்கு உங்கள் படத்தின் மீதோ அல்லது நீங்கள் போட்ட முதலீடு மீதோ எந்த ஒரு அக்கறையும் இருப்பதாக நம்புவதற்கில்லை. மேலும் அறிவாலயத்திலிருந்து ஐயா கொளுத்திப் போட்டதினால் விஷயம்இன்னும் சூடு பிடித்து அம்மாவை கேமரா முன் நிற்க வைத்தது என்பது அனைவருக்கும் தெரியும்.

ஆனால் நீங்கள் விஸ்வரூபம் படத்தை எடுத்ததின் மூலம் ஒரு பாடம் கற்றுக்கொண்டிருப்பீர்கள் என்று நம்பும் ஆறுகோடி தமிழ் மக்களில் நானும் ஒருவன்.

நீங்கள் எந்த மதத்தினரையாவது  கிண்டல் செய்து,அல்லது விமர்சித்து உங்கள் சமூக அக்கறை, பகுத்தறிவு சித்தாந்தம் இத்யாதி இத்யாதி முதலியவற்றை நிரூபிக்க வேண்டுமென்றால் இருக்கவே இருக்கிறது இந்து மதம். அதை என்ன வேண்டுமென்றாலும் குத்தி கிழியுங்கள், சும்மா எவனாவது குரல் விட்டு விட்டு குப்புறப் படுத்துக்கொள்வான். உங்கள் படத்திற்கு பிரச்சினை வராது.

எந்த எதிர்ப்புமே வரவேண்டாமென்றால் அவ்வை சண்முகி மாதிரி ஒரு படம் எடுங்க. விஸ்வநாத அய்யர் மாதிரி ஒரு கேரக்டரை உருவாக்கி கையில் க்ளாஸ் கொடுத்து ஸ்திரீ லோலனாக காண்பித்து, நீங்க மடிசார் கட்டி மாரை திறந்து காண்பியுங்க, எவனும் கொடிபிடிக்க மாட்டான். இந்திய இறையாண்மைக்கும் கேடு வராது.

இல்லையென்றால் ராமானுஜரின் கட்டுக்கதையை ஆராய்ந்து இன்னும் உங்கள் கற்பனை வளத்தை காண்பித்து, சிவனின் பெயரால் சமணர்களை கழுவில் ஏற்றிய கொடியவர்களின் கதையை குடைந்து எடுங்க.  எவனும் நாக்கு மேல பல்லு போட்டு பேசி, கொடி பிடிக்க மாட்டான் போராட்டம் நடத்த மாட்டான். ஆட்சியாளரகளுக்கும் எந்த சட்ட ஒழுங்கு பிரச்சினையும் இருக்காது.

கமல் நீங்கள் ஒரு சிறந்த கலைஞராக இருக்கலாம், மக்களிடமும் ஓர் அளவு ஆதரவு பெற்றவராக இருக்கலாம்,  ஆனால் அதை தவறாக பயன் படுத்தாதீர்கள். விஸ்வரூபம் பிரச்சினையினால் நீங்கள் கொடுத்த வாக்குறுதிகள், நடித்த நடிப்புகள், பேட்டிகள் முதலியவற்றினால் சராசரி ரசிகன்  உங்கள் மீது வைத்திருந்த  நம்பகத்தன்மையை இழந்து விட்டீர்கள்

இப்படிக்கு

 ஒரு சராசரி தமிழ் சினிமா ரசிகன்